Category: Uncategorized @oc

Eth dia 18 de mai s’a desvolopat er eveniment “Va de Networking” en Centre d’Empreses Innovadores Val d’Aran (CEI Val d’Aran). Er objectiu d’aguesta activitat a estat crear sinergies entre es naui projèctes que se creen e es empreses ja consolidades. 

I an participat un totau de 9 empreses dera Val d’Aran e dera Alta Ribagorça e personau tecnic des administracions des dus territòris. D’aguesta manèra se demòstre era volontat des agents de crear un hilat que fomente era collaboracion coma metodologia de trabalh. Aguesta activitat ei adreçada a empreses, professionaus e persones innovadores e emprenedores damb ambicion de crear un espaci a on presentar es negòcis, idees o projèctes. Atau madeish, era possibilitat de conéisher a d’autes persones facilite hèr contactes, naui sòcis o sòcies e naues oportunitats de negòci.

 Networking, ei a díder, trabalh en hilat, ei era manèra de trabalhar des Centres d’Innovacion Territoriau. Ei ua apòsta clara peth talent des territòris ruraus de montanha. Ath cap e ara fin, aguesta forma de desvolopar es projèctes permet descorbir empaties entre es persones e sintonies professionaus.

En HèPic, damb es nòsti programes adreçadi a entitats privades e administracions publiques, volem fomentar era creacion de sinergies coma aguestes. Promocionar eth talent locau e diversificar era economia des territòris ruraus son objectius clars. Ath delà, fomente era innovacion e era implementacion de negòcis.  Se t’interèsse eth networking e vòs participar en activitats coma aguesta, non dobtes en contactar damb nosati a trauès deth mail: infohepic@aran.org o consultant eth nòste Twitter: @HePic_HUB.

Hè un mes se hec eth MWC Barcelona 2022 e siguec er espaci escuelhut entà presentar er acòrd de collaboracion entre Mobile World Capital Barcelona, Hispasat, Conselh Generau d’Aran e Arantec entath desvolopament dera tecnologia satellitau en zònes de nauta montanha.

Aguest projècte pilòt de connectivitat intelligenta a coma objectiu desplegar era connexion per via satellit en lòcs a on enquiath moment non i a cobertura. Damb aguest instrument se permeterà eth desvolopament responsable de zònes aluenhades des centres entà dinamizar es activitats productives e entà milhorar era qualitat des servicis.

Era connectivitat satellitau ena Val d’Aran facilitarà era prestacion de servicis coma emergéncies e sanitat, e acabarà damb es zònes sense connexion. Tanben se harà extensiva a sectors com eth torisme, eth mèdi ambient, era pagesia, etc.

Dempús dera presentacion d’aguest convèni, ara cau decidir eth lòc d’installacion d’un prumèr modèl entà verificar, damb un grop pilòt, eth desvolopament d’aguest projècte.

Es projèctes innovadors coma eth hilat de connectivitat satellitau situen era Val d’Aran coma exemple de territòri rurau de montanha damb ues problematiques concrètes e que, ath delà, conde damb era innovacion coma instrument entà hèr front ad aguesta situacion. Aguest projècte a estat acompanhat per HèPic entà ajudar ara innovacion a establir-se en territòris ruraus e de montanha. Se tu tanben ès un innovador o ua innovadora, non dobtes en contactar-mos a trauès deth mail infohepic@aran.org.

Eth Conselh Generau d’Aran ja a installat es prumères antenes de cobertura LORA damb era collaboracion de Baqueira-Beret, antenes de baish còst que permeten connectar de manèra simpla e eficienta sensors installadi ath long dera Val d’Aran. Aguest hilat vò convertir era Val d’Aran en ua destinacion intelligenta, atractiva e generadora d’oportunitats.

A compdar deth darrèr ostiu, es antenes deth hilat LORA permeten hèr un seguiment dera ramaderia extensiva deth territòri mejançant colièrs de geolocalizacion. Atau madeish, facilite informacion sus er estat deth bestiar. Actuauments, un viatge testada era tecnologia en quauques zònes deth territòri, se valore era expansion d’aguest hilat tant a nivèu territoriau coma entà hèr-la extensiva a d’auti grops professionaus. Era intencion ei utilizar-la entà redusir es risqui naturaus, e tanben monitorizar era afluéncia de persones en entorns naturaus.

Aguesta tecnologia mos pòt resultar utila entà diuèrses foncions, coma eth contròl d’accès tàs ribères e d’auti endrets de naut interès toristic, era monitorizacion dera ramaderia extensiva entath contròl deth bestiar e era prevencion d’atacs der os, eth seguiment e monitorizacion de risqui naturaus (botassi, inondacions, incendis o estacions meteorologiques) o en sector dera proteccion civiu, en tot crear punts de cobertura d’auxili o sensors de seguiment de persones en endrets sense cobertura mobila, per exemple.

Entà poder arténher tot açò, cau installar antenes estrategiques en entorn e híger naui casi d’emplec. Aguestes infraestructures permeteràn a quinsevolhe dispositiu recéber informacion en quinsevolhe endret dera geografia de montanha. 

Aguest hilat LORA se convertís en un aute instrument concebut entà solucionar problèmes e contribuïr ara digitalizacion des entorns ruraus. Aguest projècte a estat acompanhat des de HèPic entà ajudar ara innovacion a implantar-se en territòris ruraus e de montanha. Se tu tanben ès un innovador o ua innovadora, non dobtes en contactar-mos a trauès deth mail infohepic@aran.org.