Category: Servicis

En junh de 2023 a hèt un an qu’eth coworking d’HèPic dauric es pòrtes ath public. Dempús dera creacion d’HèPic se metec en marcha era configuracion d’un espaci a on es persones residentes ena Val d’Aran, atau coma es persones visitantes, podessen disposar d’un lòc de trebalh adaptat as sòns besonhs.

HèPic ei ua iniciativa deth Conselh Generau d’Aran que gerís era Associacion d’Innovacion en Territòris de Montanha en tot hèr possible ua collaboracion publicoprivada que dòte de dinamisme ath Centre d’Innovacion Territoriau.

Dempús d’aguest prumèr an de trabalh, eth coworking a compdat damb 72 sollicituds. Deth totau, 66 an estat de persones que i an accedit mens de 15 dies. Per ua auta part, 6 persones an tramitat era sua sollicitud de caractèr fixe, ei a díder, persones trebalhadores que vien assiduament.

Cau díder qu’eth coworking siguec creat coma lòc entà atrèir ara poblacion e, ath madeish temps, aufrir un servici qu’a permetut generar dinamiques e sinèrgies entre es usatgères mès enlà des aspèctes professionaus.

Ei important remercar coma eth coworking d’HèPic a estat un espaci majoritàriaments freqüentat per hemnes trebalhadores. Eth 65,28% deth totau de sollicituds an estat hemnes e eth 83,33% des persones de longa durada tanben ne son.

Entad aguest estiu se demore un aument dera demanda a causa des vacances estivaus. Açò permet as persones que vien a visitar era Val d’Aran disposar d’un lòc de trabalh. Tanben serà disponible entà totes aqueres persones que participen enes corses e competicions esportives, en tot hèr possible, d’aguesta manèra, era conciliacion entre era sua passion e eth sòn trebalh.

Se vòs saber mès sus aguest an, te convidam a liéger eth document Coworking: un an de Trebalh collaboratiu. Se vòs conéisher er espaci e tramitar era tua sollicitud, pòs contactar damb nosati a trauès deth mail infohepic@aran.org.

Campus Rurau ei ua iniciatiua deth Ministèri entara Transicion Ecologica e eth Rèpte Demografic (MITECO) que vò hèr a conéisher as estudiants/es universitaris/àries eth mon rurau e, ath madeish temps, que poguen auer ua prumèra experiéncia en mon laborau en relacion damb es sòns estudis.

Aguest programa ei adreçat tàs estudiants/es de grad o de mastèr, tà que poguen hèr practiques pendent un tèrme d’aumens 3 mesi e un maximum de 5 mesi entre er 1 de junh de 2023 e eth 31 d’octobre deth madeish an.

Es entitats qu’acuelhen ad aguesti o aguestes escolars/es pòden èster administracions publiques, empreses, associacions e ONG localizades en municipis de mens de 5.000 abitants. Tà saber s’eth tòn municipi complís damb aguestes caracteristiques, pòs consultar eth següent mapa.

Aguestes practiques son finançades per MITECO. Ei per aguest motiu qu’es persones en practiques receben 1.000€ bruts mensuaus. Ei important saber qu’auràn prioritat aqueres practiques qu’aufrissen alotjament as estudiants/es. Ei a díder, qu’eth loguèr sigue gratuït entada eri e eres.

COM CAU DEMANAR QUE VENGUE UN O UA ESTUDIANT/A EN PRACTIQUES ENTARA TUA ENTITAT?

En prumèr lòc, non i a un nombre limitat d’estudiants/es que pogues recéber.

En dusau lòc, coma entitat peticionària auràs d’establir eth perfiu d’estudiant: carrèra o mastèr qu’estúdies, idiòmes, competéncies en ofimatica, etc. Un còp qu’ac sàpies, es entitats s’an de méter en contacte damb era universitat inscrita en programa Campus Rurau entà establir un convèni de practiques.

Dempús a d’èster era futura persona en practiques qui a de seleccionar era aufèrta.

Cau tier en compde que se, per exemple, non vòs incorporar qu’ua persona entath tòn personau, e establisses un convèni damb tres universitats diferentes e i a tres estudiants/es, un o ua de cada ua des universitats que solliciten es practiques, les auràs d’incorporar a totes.

AS DE BESONH AJUDA O MÈS INFORMACION?

Era Associacion d’Innovacion en Territòris de Montanha, entitat que gestione HèPic, t’ajude. Pòs contactar damb nosati a trauès deth corrèu infohepic@aran.org e hèr-mos totes es preguntes. Tanben ajudam a establir contacte damb es universitats, a cercar-les e a gestionar es sollicituds s’ès ua des nòstes persones associades.

Eth heired qu’arribe. Ei çò que se ditz enes carrèrs des pòbles aranesi, en mercat e enes comèrci. Ja se nòte que comence era sason iuernau. Es flors des balcons s’an sauvat en lòcs mès caudi, es guants e es bufandes son era milhor companhia. Com en toti es entorns ruraus de montanha, era gent comence a èster nerviosa e impacienta. Cau dar-se prèssa entà preparar-se entar iuèrn e, tanben, entara nhèu.

S’anóncien precipitacions blanques entara dimenjada. Es còtes de nhèu baishen e açò vò díder qu’es espòrts d’iuèrn comencen. D’entre toti, er esquí ei eth majoritari. Es pistes d’esquí dauriràn es sues pòrtes. E aquerò qué vò díder? Qu’es nòsti pòbles pirenencs s’aumpliràn. Vierà gent de d’auti lòcs entà gaudir dera aufèrta de servicis qu’ei restacada damb es espòrts de nhèu.

TRABALHAR E GAUDIR DERA NHÈU?

Fòrça des persones que, en aguest cas, vien a gaudir der esquí en Baquèira-Beret seguissen damb eth sòn trabalh. Ua part, an era possibilitat de teletrabalhar. Se pòden connectar damb es sòns ordenadors e non deishar de trabalhar. Coneishent aguesta circonstància, en HèPic vos volem ajudar. Coma Centre d’Innovacion Territoriau metem ara vòsta disposicion un espaci de coworking a on poiratz trabalhar a plaser.

Plaçat en Vielha, en aguest espaci s’i pòt arribar facilaments en transpòrt public, en coche de linha de Vaquèira tà Les. Tanben s’i pòt arribar en coche e, en arturar-se en Vielha, non cau seguir es veïculs que van tara estacion d’esquí.

Ath delà, en tot vier a esquiar tà Vaquèira o a Superbagnères trabalhant en coworking de HèPic, poiràs conéisher a persones professionaus damb bagatges fòrça diuèrsi. Açò ei ua grana hònt d’innovacion. Eth hèt de compartir temps e espaci afavorís poder auer convèrses damb d’autes persones. E, ath viatge, aguest escambi ajude a conéisher naui punts de vista e auer naues idees tà empréner naui projèctes.

QUINES VERTUTS A ERA SASON IUERNAU?

En prumèr lòc, es persones que, en aguest cas, vien a gaudir der esquí en Baqueira-Beret e Superbagnères an trabalhs diferenti. Dera consultoria enquiath sector sanitari. Son professionaus damb un bagatge pròpri e diferent. Per aquerò, coma didíem, cree innovacion.

De un aute costat, vier tara Val d’Aran, encara que sigue a esquiar, te facilitarà era possibilitat de conéisher eth teishut empresariau innovador dera Val. Enes nòsti municipis i a empreses digitalizadores, empreses partidàries deth desvolopament sostenible e era responsabilitat sociau, empreses qu’utilizen instruments tecnologics capdavantèrs entà desvolopar es sòns prètzhèts e comèrci damb un savoir-faire infinit.

Poiràs vier a gaudir dera nhèu e, ath delà, poiràs conéisher es empreses e agents deth territòri.

PERQUÉ VIER TATH COWORKING?

En aguesti espacis compartidi, ath delà de trabalhar damb ues autes persones, hèm activitats amassa. Non tot ei trabalhar, tanben impòrte eth léser. En espaci de HèPic, hèm gessudes e excursions. Mos agrade gaudir dera natura e dera beresa des pòbles aranesi e francesi.

I a persones de diuèrsi endrets: de Madrid, Barcelona, Castelha, França… Açò permet conéisher naues recèptes de codina que compartim. Tanben escambiam es nòsti gosti de cinèma, de musica e de lectura. Se vies a trabalhar, te poiràs emportar ua infinitat de recomanacions entà passar es dies mès heireds der iuèrn.

Aguestes activitats de networking van mès enlà. Poiràs vier damb toti e totes es coworkers de HèPic a préner un cafè e conéisher tota era aufèrta gastronomica aranesa.

Per aguesti motius, s’as intencion de vier a passar uns dies d’esquí e as de besonh un espaci entà trabalhar, mos pòs contactar entà conéisher eth coworking. Non dobtes a meter-te en contacte damb nosati e sajaram de resòlver toti es tòns dobtes.

Darrèraments tot se hè en format online: amassades, conferéncies, formacions, ventes, resèrves, etc. Ès ua persona connectada. Te servisses des hilats sociaus entà distrèir-te, comunicar-te, cercar promocions e trabalhes a trauès de dispositius interconnectadi.

Ena vòsta empresa se parle dera existéncia d’un procès de digitalizacion. Açò, qué vò díder? Quauqu’uns pensen qu’era nomentada digitalizacion ei eth hèt de poder trabalhar a distància. Qu’ages un dispositiu informatic e que, gràcies ada eth, pogues trabalhar des de diuèrsi lòcs coma en casa, en pòble o en ua auta ciutat diferenta ara dera tua empresa.

Gràcies ath desvolopament tecnologic, açò ei atau. Pòs trabalhar en espacis compartidi coma es coworking. Aquiu pòs coïncidir damb persones de d’autes empreses e damb ues autes professions, e aquerò genère un escambi d’idees que fomente era innovacion.

QUÉ EI ERA DIGITALIZACION?

Mès era digitalizacion non ei sonque auer dispositius tecnologics e ua connexion a internet que te facilite eth teletrabalh. Era digitalizacion ei fòrça mès causes. Aguest procès innovador consistís en enregistrar e tractar dades de manèra digitau damb er objectiu de transformar digitaument es negòcis.

Ei a díder, era digitalizacion vò qu’es prètzheits des nòsti trabalhs siguen informatizadi. Açò ei que se hèsquen mejançant programes informatics interconnectadi. Per exemple, qu’es factures dera empresa, en lòc d’auer-les de hèr manuaument, i age un programa que les complète e qu’ath delà açò se reflectisque en libre de compdes. Mès, tanben, qu’aguestes siguen sincronizades damb es albarans de liurament de provediments e que, quan arriben, se pogue saber guaires unitats an estat liurades e se se correspones damb es sollicitades ena factura.

AVANTATGES DERA DIGITALIZACION

Tot aguest procès qu’era digitalizacion vò sistematizar a avantatges: permet redusir eth temps de trabalh, que pòt èster destinat a d’auti ahèrs. Eth hèt qu’aguestes activitats siguen sincronizades facilite destinar recorsi a trebalhs coma era atencion ath public, aumentar es accions de marqueting e comunicacion, reflexionar e dessenhar naues estratègies, per exemple.

Un aute punt fòrt ei qu’era digitalizacion ei ua tendéncia evidenta. Ves coma cada còp mès es empreses e negòcis fomenten aguest procès. Tot açò a permetut que, d’un costat, i age subvencions que paguen part dera digitalizacion e, d’un aute costat, qu’age agents especializadi en aguest entorn. Per açò, ei ara vòsta disposicion un sector empresariau professionau de naut nivèu e que pòrte un long recorrut. Aguesta experiéncia ei un factor de confidança s’apòstes pera digitalizacion deth tòn negòci.

E tà acabar, un aute avantatge ei era produccion d’informacion. En sincronizar es procèssi, pòs establir patrons coma, per exemple, saber quan i a mès visites en tòn negòci, qué son es productes que mès s’an de besonh en foncion dera sason o tà quina ora as mès interaccions enes hilats sociaus. Eth ventalh ei ample. Gràcies ara digitalizacion, aguestes dades non son format fisic, per tant non ocupen espaci. E es madeishi programes que permeten era digitalizacion t’aufrissen ua analisi de tota era informacion.

Tot açò se tradusís en ua major capacitat d’adaptacion dera tua empresa e eth tòn negòci. Damb açò se pòt destinar recorsi en foncion des besonhs qu’obsèrves damb es dades.

COMA ME POGUI DIGITALIZAR?

En HèPic vos aufrim assessorament en forma de mentoria. Aguest programa gratuït te permeterà conéisher es punts de melhora digitau que s’adapten ath tòn projècte empresariau. Tanben poiràs resòlver toti es tòns dobtes sus era inversion qu’as de besonh entà arténher ua digitalizacion complèta.

Atau madeish, mos pòs contactar entà conéisher es ajudes e subvencions que s’adapten ara tua empresa e objectius. D’aguesta manèra poderàs conéisher convocatòries coma era de KIT DIGITAU.

Aguest abonament que concedís era administracion vò ajudar ara digitalizacion deth teishut empresariau. Per açò, en foncion deth nombre de trabalhadors dera tua activitat, pòs sollicitar de 2.000 a 6.000€. Toti es sòs son a hons perdut. A tu non te cau hèr arren mès que sollicitar-la e contractar es servicis des empreses qu’aufrissen servicis tecnologics e enregistradi coma Agents Digitalizadors. Dempús, aguesti sòs se computaràn coma pagament peth servici qu’ages recebut.

En ecosistèma de HèPic, i a Agents Digitalizadors damb experiéncia que vos pòden ajudar a conéisher es tòns besonhs, a formalizar era sollicitud dera subvencion e a executar era activitat digitalizadora.

Era digitalizacion ei ua tendéncia innovadora qu’a arribat tant as grans empreses des ciutats, coma as petiti negòcis enes pòbles. Gràcies a empreses damb experiéncia e a ajudes, era digitalizacion ei a disposicion de fòrça negòcis. S’as quauque dobte o vòs començar aguest projècte, nosati te podem ajudar. Non dobtes en contactar-mos a trauès deth mail: infohepic@aran.org o deth telefòn: 667 670 271.

TORNAM TARA ESCÒLA: ETH COWORKING

Ja a arribat aguest moment der an a on tot s’oriente ath torn d’un objectiu: tornar entara escòla. Es vacances d’ostiu s’an acabat, es tardes ara fresca demoren postposades enquiar an que ven, encara que siguen eth rebrembe mès recent. Ara ei ora de tornar tara rotina. Mès, com passe damb es mès petiti, non ei tan facil repréner eth ritme de trabalh. Cau un periòde d’adaptacion, anar pòc a pòc.

Quan te n’anès de vacances aueres de coordinar quauqui projèctes, dar quauques directives a quauqui companhs o respóner a quauques telefonades e trobès un espaci coworking a on hè’c, ara ei semblant. Eth coworking ei eth tòn espaci a on repréner eth trabalh. Eth coworking ei eth tòn espaci entara tua tornada tà estudi.

Eth coworking de HèPic ei un espaci diafan e flexible en çò que tanh ar orari. Se te facilitarà ua clau damb qué i poiràs accedir en foncion des tòns besonhs. Per aguesta rason, poiràs anar tath tòn lòc de trabalh segons com t’organizes. Açò te permeterà alternar eth trabalh damb moments mès tranquils a on rebrembar es activitats de junhsèga e d’agost. Tanben pòs aumentar es ores de trabalh. Cada dia dedicaràs un shinhau mès de temps ara tua jornada professionau. Ací non i a contròl, tot depen de tu.

E com ena tornada tara escòla, es companhs càmbien. En coworking poiràs auer naui companhs de trabalh d’edats, perfius e inquietuds diferentes. Entre toti se forme un grop interdisciplinar de trabalh que pòt neurir es projèctes de cada ua des persones que l’intègren.

As eth tòn espaci de trabalh entà concentrar-te, mès non ès pas solet. Trabalhes amassa damb d’autes persones. S’ac as de besonh, pòs compdar damb eres. Era ajuda mutuau ei basica enes hilats de trabalh. Era ajuda mutuau ei ua des rasons d’existir des coworking. Ara fin, son espacis a on compartir lòc de trabalh e relacions professionaus intersectoriaus.

ETH COWORKING PENDENT ES VACANCES

Pendent er ostiu, eth coworking a estat un lòc ideau entà combinar es ahèrs professionaus damb es vacances, es amics e era familha. Cada setmana i auie gent naua que demanaue per espaci entà vier a trabalhar.

Provenenti de Madrid e Barcelona, sustot, aguestes persones auien perfius diuèrsi: professors universitaris, engenhaires aeroespaciaus, responsables de compdabilitat d’empreses, etc. Totes aguestes persones an podut compartir un moment e un lòc e açò a possibilitat un ambient de trabalh amicau e relaxat.

“Ara que sabem qu’existís aguest espaci, vieram mès soent”, “sense aguest espaci auessa auut de demorar en casa trabalhant mentre era familha ère de vacances e vier tara Val d’Aran mès tard”, comenten es persones qu’an estat per ací. Era sua experiéncia, entada eri ei fòrça agradiua, les a permetut trabalhar tranquillaments e conéisher er entorn. Ara fin, an sabut combinar tot tipe d’activitats.

ETH RÈPTE D’INNOVAR

Dilhèu, aguesta tornada tara escòla sigue mercada pera tua volontat d’empréner naui projèctes. Fòrça persones tròben en aguesti mesi naui objectius entà arténher: cambiar de trabalh, cambiar era ciutat peth pòble, empréner un negòci.

En mon rurau tot açò ei possible. S’eth tòn lòc de trabalh actuau t’ac permet, perque trabalhes a distància, pòs deishar aguesta ciutat entà trobar era Val d’Aran, un lòc agradable entà viuer-i. Er entorn damb es sòns abitants, era natura qu’entornege es pòbles, era aufèrta de léser, variada e dinamica de cada setmana e es espacis entà trabalhar, com eth coworking. Aguest pòt èster un lòc a on començar aguesta naua vida. I coneisheràs a d’auti trabalhadors que pòden introdusir-te ena vida locau, ath madeish temps que manties eth tòn trabalh.

De un aute costat, pòt èster era oportunitat entà empréner. As pensat en quauque projècte innovador? En un coworking pòs trobar un hilat de persones professionaus que te poiràn condar es rèptes actuaus deth territòri, es sòns punts de vista e es sues experiéncies coma professionaus emprenedors. Tanben te pòs deishar conselhar gràcies as programes gratuïts de mentoria de HèPic.

En Centre d’Innovacion Territoriau HèPic metem a disposicion de totes es persones dera nòsta comunitat formacion entà conéisher naues tecniques o visions de negòci. Tanben auem eth programa de mentoria, a on t’ajudam a auer idees naues, a assolidar eth projècte, a dar pincelades entà qu’era tua idea sigue competitiva e viabla o tà qu’eth tòn esperit empresariau sigue un exemple clar de succès. Mès, s’ès inversor, nosati te podem meter en contacte damb emprenedors locaus, damb dinamizadors deth territòri qu’amien a tèrme idees innovadores damb un gran potenciau.

UN COWORKING RURAU

Toti aguesti son es avantatges d’un coworking en aguestes dates: te da flexibilitat entà programar-te eth trabalh, ei ua manèra d’alongar era sensacion de vacances mentre t’incorpòres as tòns quehèrs. Tanben, se vòs hèr cambis ena tua vida, ei un factor a tier en compde. Facilite era possibilitat d’installar-se en entorns ruraus mentre manties eth tòn lòc de trabalh.

Aguesta tornada tà estudi pòt èster tanben eth moment d’empréner e trigar era Val d’Aran entà hèr-i negòcis. Se vòs desvolopar naui projèctes, pòs trobar a persones que t’expliquen eth contèxte e es sues experiéncies. Tanben te pòs assessorar gràcies as facilitats que t’aufrís HèPic.

Es vacances son ací. Seguraments ja ac auetz previst tot: era destinacion, es activitats, es restaurants, er alotjament. Eth moment tan desirat ja arribe. Per un costat, auem era sensacion d’aué’c artenhut, d’arténher un objectiu. Der aute, cau deishà’c tot organizat entà quan non i sigues. Mès tostemp i a aguesta incertitud e inseguretat de saber se tot gesserà com ei previst. Ei per açò que, a viatges, as de besonh un espaci tà on poder-i hèr quauqua reünion, hèr ua conferéncia o completar un document. Ei completaments normau, cerques un coworking.

QUÉ EI UN COWORKING?

Aguesti espacis son lòcs a on diuèrsi perfius professionaus desvolòpen es sues activitats. Eth coworking gestionat per HèPic e plaçat en Vielha ei un lòc a on pòs compartir, empréner e començar. Ei un espaci compartit pensat entà gaudir des avantatges de crear un hilat de persones innovadores e des servicis abituaus d’un burèu. Eth sòn objectiu ei que creetz aguest hilat entà fomentar era collaboracion, er escambi d’idees, eth benèster e, en definitiva, desvolopar era innovacion.

S’ac vòs comparar damb un burèu “convencionau”, eth nòste coworking ei un espaci dubèrt a toti a on se trabalhe en un ambient de collaboracion. Non ei segmentat per departaments, çò que permet era adaptacion e era fluïditat. Tanben se pòt gaudir d’un burèu privat entà poder hèr reünions damb clients o collaboradors entà non molestar a d’auti usatgèrs. 

ES AVANTATGES DETH COWORKING

Cau remercar qu’eth major avantatge d’un coworking ei que non ès solet. Ara, en ostiu, trobaràs d’auti trabalhadors comprometudi damb eth sòn projècte que, mentre gaudissen des vacances, dediquen un shinhau de temps as sòns projèctes. Açò permet escambiar experiéncies e fomentar un hilat de professionaus. En definitiva, hèr networking.

En aguest hilat d’expèrts met en comun a persones locaus, dera region, qu’utilizen er espaci assiduament damb persones coma tu que se tròben de viatge. Permet conéisher es tendéncies deth lòc, eth contèxte e tanben possibles oportunitats de mercat o de collaboracion.

PERFIU DE COWORKERS

Es persones qu’assiduament vatz tad aguesti espacis ètz diuèrses, de diferenti sectors professionaus, edats e interèssi. En generau, trobam persones que i van longui periòdes de temps, pendent uns mesi o ans, e d’auti que i vatz esporadicament.

Ara qu’ètz en vacances, aguest ei eth vòste espaci. Es espacis coworking vos permeten coordinar eth léser damb es moments vacacionaus e eth trebalh que vos demore pendent de hèr e que non pòt demorar. Ath delà, es coworking receben a persones diferentes e es experiéncies demòstren com entre toti s’an creat contactes e s’an cambiat idees professionaus. Tant ei atau que i a usatgèrs que se dediquen a viatjar mentre trabalhen en aguesti espacis. Son es nomentadi Nomades Digitaus.

Son persones que profiten era connectivitat e es naues tecnologies entà trabalhar en remòt. A viatges, non an un lòc fixe de residéncia, se botgen. Un des avantatges qu’aguestes persones tròben en aguest estil de vida professionau son es relacions qu’establissen damb d’auti professionaus, eth trabalh en hilat. Aprenen ues autes manères de compréner es rèptes que pòden aparéisher, es experiéncies de d’auti trabalhadors…

Açò ei ua comunitat. Non impòrte era edat, era origina, era tipologia de projèctes o era sua maduresa. Toti ètz benvengudi. Per exemple, actuauments i van persones que se dediquen a estudis scientifics. Desvolòpen un trabalh postdoctorau sus eth benèster animau e era seguretat alimentària. Ath madeish temps, d’auti companhs desvolòpen eth sòn trabalh d’analisi d’impacte mèdiambientau e desvolopament durable.

En resum, es coworkings son lòcs de trabalh que s’adapten as besonhs des trabalhadors e que permeten compartir e empréner naues idees. I pòs trobar empreses locaus e d’autes de dehòra damb es que pòs compartir e dar lòc a solucions innovadores entàs projèctes.

COWORKING CONTRA ERA DESPOBLACION

Auer enes pòbles espacis de trabalh compartidi met de manifèst, en prumèr lòc, eth talent que i a enes zònes ruraus e es coneishements des persones d’aguesti entorns. En dusau lòc, arraïtze era poblacion, ja que facilite eth desvolopament de naui projèctes e, a viatges, abaishe es còsti entàs persones empresàries. En tresau lòc, permet crear e mantier hilats de collaboracion enes pòbles qu’aufrissen ajudes a naues persones emprenedores.

Era connectivitat d’aguesti lòcs, es facilitats que se dan entà que s’establisquen es persones enes pòbles, er escambi d’idees que se produsís, tot açò demòstre que i a talent e que, ath delà, existís un compromís entà mantié’c. Ei per tot açò qu’es coworking afavorissen eth creishement deth teishut economic des pòbles. Se s’i somen d’autes mesures, se convertís en un factor de luta contra era despoblacion. En definitiva, son un instrument mès entà dinamizar es pòbles.

As visitat bèt còp un espaci coworking? As organizat escapades en foncion dera disponibilitat d’aguesti espacis? Actuauments s’an convertit en un servici damb un gran potenciau entàs pòbles, es sòns abitants e es visitaires. Se vòs saber mès sus es espacis de coworking, mos pòs contactar.

Eth deluns 30 de mai se daurirà eth coworking de HèPic. Aguest servici s’aufrís ad aqueres empreses e persones innovadores que volguen desvolopar es sòns projèctes des dera Val d’Aran.  

HèPic ei un projècte deth Conselh Generau d’Aran que fomente era innovacion en territòri coma responsa sostenibla deuant es besonhs d’un territòri rurau e de montanha. Entre es servicis d’assessoria e eth desvolopament de projèctes tant publics coma privats, er espaci de coworking se concep coma un entorn entà crear trabalh en hilat. Es usatgèrs poiràn profitar er escambi d’idees entre professionaus que s’installen en aguest tipe de lòcs.  

Eth coworking compde damb ua sala compartida, dues sales de reünions, sala de formacion e eveniments, e tanben un burèu entà auer amassades privades. Aguest entorn propici entath desvolopament de naui projèctes estimule era flexibilitat, eth dinamisme e era innovacion coma motors de creativitat e collaboracion.  

Es persones que i siguen interessadi mos pòden contactar a trauès deth corrèu electronic infohepic@aran.org e/o a trauès deth numèro de telefòn 667 67 02 71. Vos demoram!