• Es dies 5 e 6 de noveme, Albarracín (Teruel) siguec er epicentre dera IV Trobada der hilat de Centres d’Innovacion Territoriau (Red CIT) ena que participèren es membres de HèPic.
Aguesta quatau trobada, siguec organizada entre era Diputación de Teruel, a traués deth CIT de Teruel, e eth Ministerio para la Transición Ecológica y Reto Demográfico (Miteco) deth govèrn centrau, qu’amassèc a ues 120 persones de tota Espanha procedentes en grana part des diuèrsi CITs entre es que se trape HèPic.
Eth President dera Diputación de Teruel, Joaquín Juste, eth director generau deth Govèrn d’Aragon, Alberto Casañal, eth Secretari Generau entath Rèpte Demografic, Paco Boya e er alcalde d’Albarracín, Daniel Ubeda inagurèren aguest eveniment qu’acuelhèc era Fundación Santa María de Albarracín en Palai d’amassades e congrèssi.
🌱⚡Es protagonistes d’aguestes jornades an sigut era innovacion e era colaboracion coma airina entà combàter era despoblacion e retier eth talent enes zònes ruraus, e es estratègies mès efectives entà arténher eth relèu generacionau des negòcis e comerci locaus.
💡 Pendent es dus dies, es associats deth CIT de Teruel presentèren projèctes fòrça inspiradors damb es qu’an trabalhat en endrets despobladi a on an creat naues oportunitats entà fixar poblacion e balhar supòrt as persones emprenedores ruraus. Es tematiques principaus entorn as debats an sigut:
Torisme
Relèu generacionau
Talent
Tanben auem podut auer eth luxe d’apréner de ponents expèrts, que an compartit ua vision transversau dera innovacion rurau de diuèrsi punts d’enguarda: sus eth torisme regeneratiu, era soberania alimentària e energetica, era valorizacion des productes locaus o era colaboracion damb entitats europees, en tot atier tostemp as qüestions de sostenibilitat. 🤝🌍
Ath delà, en acabar eth programa oficiau, es membres de toti es CIT d’Espanha, mos amassèrem ena taula de trabalh der hilat des CITs, ath sòn capdauant deth Secretari Generau, Paco Boya, era directora generau de politiques contra era despoblacion, Ángeles Marín e eth subdirector Generau de Politiques antidespoblacion Adrián Muelas, compartiren era naua estructura entà promòir era colaboracion entre territòris ruraus qu’a despiet d’auer particularitats disparières, compartissen fòrça rèptes. En paraules deth Secretari Generau, Paco Boya: “ei de besonh afrontar era complexitat des nòsti territòris damb projèctes qu’agen en compde era viuenda, es servicis basics, eth trabalh, era joenessa, era gent grana e er accès ara cultura”.
👏 De HèPic ençà, transmitim eth nòste arregraïment ath CIT de Teruel e ara Red CIT pera excellenta acuelhuda, tracte e logistica. Ues jornades plan fructiferes, centrades en platejar e promòir estratègies de repoblacion d’ua perspectiva realista ençà. Arregraïr tanben ara Fundación Santa María de Albarracín pera sua atencion e suenh, e peth sòn extraordinari trabalh de conservacion patrimoniau.
Eth Conselh Generau d’Aran, a trauès de Hèpic, eth Centre d’Innovacion Territoriau dera Val d’Aran, e damb eth supòrt dera Agència de Ciberseguretat de Catalunya e era Diputacion de Lleida, a organizat eth prumèr Congrès de Ciberseguretat Armari 6.
Es dies 24 e 25 d’octobre, era Sala era Audiovisuau de Vielha acuelhie era prumèra edicion deth Congrès de Ciberseguretat “Armari 6”, que s’extenèc en marc dera setmana dera ciberseguretat damb activitats prèvies ath congrés d’expèrts dirigides ara joenessa e ciutadania d’Aran, e activitats posteriores, entà aqueri assistents qu’alonguèren era sua estada enquiara dimenjada.
Er objectiu d’aguesta prumèra edicion a estat aufrir solucions efectives as rèptes actuaus que plantege era ciberseguretat, en tot convocar a expèrts des administracions publiques e deth sector privat entà compartir aprenentatges e auançar ena luta contra es amenaces cibernetiques.
Ath long des dues jornades, es especialistes ena matèria presentauen, a trauès de ponéncies e ua taula redona, es sòns coneishements, tà impulsar eth debat e escambiar experiéncies en ua prumèra edicion qu’a amassat un totau de tretze ponents e cent dètz assistents.
Er eveniment inicièc damb era benvenguda institucionau per part de Juan Antonio Serrano, alcalde de Vielha e Mijaran , Agustí Jiménez, vicepresident dera Diputació de Lleida e deputat der airau de naues tecnologies, Paco Boya, secretari generau entath Rèpte Demografic, qui expliquèc era origina istorica der armari des sies claus que da nòm ath congrès, e era intervencion dera sindica d’Aran, Maria Vergés qu’afirmèc: “Qu’aguest congrès vò democratizar es oportunitats des territòris de montanha en çò que tanh as naues tecnologies e era innovacion”, e higie que: “volem demostrar qu’èm capables de projectar-mos ar exterior en tot organizar eveniments d’aguestes carcteristiques sus ua problematica fòrça importanta coma era ciberseguretat qu’afecte tant as institucions coma as enterpreses e ara ciutadania”.
Es ponéncies s’encetèren damb er expèrt en ciberseguretat dera enterpresa Telefonia, Alex Guasch, que restaquèc era automatizacion deth Centre d’Operacions de Seguretat (SOC) damb diuèrsi episòdis istorics relevanti en tot hèr un simil d’aguesti procèssi. E entà barrar era prumèra jornada, descorbirem dera man de Jordi Garcia Castillón, CEO de CyberTECCH coma era ciberseguretat s’a desvolopat ena naua era dera intelligéncia artificiau entot remercar era importància dera conscienciacion sus aguest nau paradigma.
Londeman, daurirem era dusau jornada deth congrès parlant des tendéncies actuaus qu’estant redefinint era ciberseguretat dera man deth gran expèrt de l’Agència de Ciberseguretat de Catalunya, cap dera unitat de donades, Santi Romeu.
Ara seguida, era CEO d’OptimumTIC, Rosa Ortuño parlèc deth marc de seguretat qu’an de complir es administracions publiques e totes aqueres enterpreses que les presten servicis tecnologics e era implementacion e compliment der Esquèma Nacionau de Seguretat (ENS).
Ena madeisha linha, era directora de certificacions dera Agència de Ciberseguretat de Catalunya, Helena Rodríguez hèc ua aproximacion practica sus es principis e requesits des sistèmes d’informacion dera administracion publica ena implantacion der ENS.
Dempús d’ua breu pausa, auec lòc era taula redona jos eth titol: Diferenti enfocaments entà un madeish objectiu: protegir era nòsta organizacion, moderada per Ramón Arnó, CEO de La Familia Digital que geric un interessant e fructifer debat entre expèrts d’airaus fòrça disparièrs. Damb sies participaires, per part dera administracion publica ençà, Iván Betrán, director deth departament de Naues Tecnologies dera Diputació de Lleida. Der airau privat, damb era participacion d’ua grana empresa, Repsol, a trauès deth sòn director de Ciberseguretat e Risc tecnologic, Javier García Quintela. Amassa damb dues empreses mejanes, Vunkers damb eth sòn CEO, Albert Mas e er especialista en ciberseguretat deth Grupo SIRT, Albert Gris. Toti eri damb empreses deth territòri damb base tecnologica, Baqueira Beret damb era participacion deth sòn CIO José Luis Solé e d’Eisharc Jaquet, CEO d’Arantec.
Eth debat se centrèc en dues qüestions: coma cada expèrt a dessenhat ena sua organizacion tot çò qu’afècte era ciberseguretat e quini son es tres majors rèptes restacadi damb era ciberseguretat, en tot compartir punts d’enguarda.
Ara seguida, Joana Marí, delegada de proteccion de donades e responsable de projèctes estrategics ena Autoritat Catalana de Protecció de Dades dera Generalitat, hèc ua introduccion ath reglament 2016/679 e expliquèc eth marc legau des incidents de ciberseguretat.
Era intelligéncia artificiau tornèc a èster protagonista damb era ponéncia de David Company, enginhaire en investigacion e desvolopament en ciberseguretat ena Fundació i2cat qu’expliquèc coma aguesta intelligéncia servís tant as ciberatacans coma as ciberdefensors.
Ath delà, d’una manèra fòrça ben estructurada e practica, Raül Roca, CEO de Grail Cyber Tech narrèc era gestion, analisi e responsa d’un ciberatac en un hotel fictici entà avalorar eth plan de responsa, patrons e leçons aprenudes.
Eth congrés finalizèc damb eth cap de conscienciacion e investigacion de ESET, Josep Albors que descriuèc damb gran claredat es tecniques qu’utilizen es delinqüents: coma ataquen, que hèn un còp entren en sistèma, quin ei eth sòn objectiu e es conseqüéncies entara enterpresa, entà passar a establir es possibles solucions a aplicar.
Fin finau, era clausura der eveniment siguec realizada pes caps d’innovacion deth Conselh Generau d’Aran: Guillem Piris e Sergio López, e entà barrar er acte, eth conselhèr d’Innovacion, Oriol Sala, dèc es arregraïments as ponents, ara organizacion e as assistents.
Un còp acabat eth programa oficiau deth congrès, s’an hèt activitats pendent era dimenjada damb era presentacion deth projècte innovador GUARDA+ damb tecnologia de realitat aumentada e visites tà diuèrsi endrets emblematics dera Val d’Aran coma era Artiga de Lin.
Deluns s’encetaue era prumèra edicion que se celèbre en Aran damb 10 professionaus digitaus que trabalharàn en remòt en coworking de HèPic, eth hub d’innovacion deth Conselh Generau e interactuaràn damb eth teishut economic e sociau d’Aran.
Deluns, era sindica d’Aran, Maria Vergés, e eth conselhèr d’Innovacion, Oriol Sala, presentèren ena sedença deth govèrn aranés era naua edicion deth ‘Catalunya Rural Hub’, que consistís en atrèir professionaus der entorn digitau tàs zònes ruraus damb er objectiu d’afavorir er arraïtzament deth talent, combàter eth despoblament e promòir eth teishut productiu e comerciau dera naua economia digitau enes territòris de montanha.
Eth perfil d’aguesti dètz nauvenguts digitaus ei fòrça tecnic, era majoria d’eri son engenhaires especializadi en dades, ciberseguretat, intelligéncia artificiau e neurosciéncia. E en çò que tanh ara provenença, n’i a sèt que vien dera província de Barcelona, tres dera de Tarragona e ua persona dera província de Girona. Gràcies ara nauta demanda de sollicituds d’aguest projècte, s’auec de hèr ua seleccion des candidatures damb critèris de diversitat sectoriau.
Segons era sindica d’Aran, Maria Vergés:“s’a daurit ua naua pòrta d’oportunitats entàs territòris de montanha gràcies ara possibilitat deth format de teletrebalh implantat en fòrça enterpreses, e eth Catalunya Rural Hub represente ua excellenta experiéncia entà toti aqueri qu’an era volontat de desplaçar-se tath mon rurau entà continuar era sua carrèra professionau”.
Pendent dues setmanes, enquiath 27 d’octobre, aguesti trabalhadors e trabalhadores poiràn hèr ua pròva pilòt de coma ei víuer e trabalhar en Aran en tot complir damb era sua jornada laborau en remòt des deth coworking de HèPic, a on s’a abilitat un espaci entada eri en convivéncia damb es professionaus deth coworking de longa estada.
E tàs tardes e es dimenjades, s’an organizat nombroses activitats opcionaus entà que poguen conéisher es rèptes des enterpreses damb basa tecnologica d’Aran, e tanben gaudir des nòsti paisatges e descorbir era nòsta cultura pròpria. Un programa fòrça complet damb er objectiu de qu’es participants deth projècte poguen experimentar era qualitat de vida qu’aufrissen es territòris de montanha.
En paraules d’Oriol Sala, conselhèr d’Innovacion: “era nòsta intencion damb aguest projècte ei, ath delà d’arténher que quauqu’uns des participants s’establisquen en territòri e desvolòpen eth sòn projècte empresariau en Aran, ei crear sinèrgies e ampliar coneishement en airaus tecnologics e dera innovacion damb es enterpreses deth territòri”.
🤖A trauès deth hub d’innovacion HèPIC, deth Conselh Generatz d’Aran e era Cramba de Comèrç de Lhèida, auem organizat eth prumèr cors d’estruments professionaus d’intelligéncia artificiau ena Val d’Aran.
Aguesta naua formacion l’impartirà eth format presenciau era enterpresa DiiP, fondada per dus joens aranesi expèrts ena matèria, José Solà e David Santana.
📆Aguest cors començarà eth 18 de seteme e durarà enquiath 27 de noveme, en tot realizar-se toti es dimèrcles de 16 a 19 h dera tarde, en tot somar un totau de 300 ores. Era ubicacion #a on s’amiarà a tèrme serà era Aula de Formacion deth Conselh Generatz d’Aran #que se tròbe ara Ctra. De Gausac, 1, baishi de Vielha.
Damb coneishences basiques e fòrça practics d’intelligéncia artificiau, aguesta formacion gratuïta e daurida a toti es publics, te coma objectiu apropar aguest innovador estrument tecnologica entà hèr-la accessibla e utila ena sua aplicacion en encastre professionau.
Es places son limitades e entà inscriuer-se ei de besonh enviar un corrèu a: infohepic@aran.org, en tot indicar eth nòm complèt e telefòn de contacte.
😎A compdar d’aué, dijaus 25 de junhsèga, en el Musèu dera Val d’Aran, i aurà 4 lunetes de realitat augmentada desvolopada desvolopada pera empresa aranesa Arantec, damb era que poiratz visitar endrets emblematics d’Aran e obtier donades meteorologiques deth nòste territòri.
D’aué enquiath dijaus 29 d’agost, de 10 a 11 ores, un/a tecnic/a deth Conselh Generau d’Aran orientarà as visitaires interessadi en gaudir d’aguesta innovadora visita, explicant eth mòde d’usatge des lunetes e facilitant es insctruccions de besonh entà familiarizar-se damb era tecnologia desvolopada e víuer ua experiéncia sosprenenta.
Es objectius d’aguest projècte son, per un costat, generar naui formats de visitar e descorbir eth nòste territòri a nivèu naturau, meteorologic e culturau, e per aute, obtier donades des prumères impressions e sensacions des usatgèrs/es d’aguestes lunetes entà poder implementar milhores ena experiéncia e perfeccionar era tecnologia entà arténher resultats cada còp més realistes.
🕶️Aguesta pròva pilòt a sigut desvolopada pera empresa Arantec gràcies ara iniciativa e supòrt deth departament d’innovacion deth Conselh Generau d’Aran a compdar dera subvencion entara financiacion de projèctes innovadors deth Ministeri de Transicion Ecologica e eth Rèpte Demografic. Més a més, aguest projècte s’enmèrque ena estrategia des Airaus Digitaus prebotjada pera Generalitat de Catalunya, eth Mobile World Capital Barcelona e era Fundació i2CAT.
Ager, eth cap de Sistèmes d’Informacion Integradi deth Conselh Generau d’Aran, Sergio López, participèc ena dusau Trobada d’Airaus Digitaus de Catalunya en Parc Agrobiotech de Lleida, organizada per i2cat amassa damb era Direccion Generau de Societat Digitau dera Generalitat de Catalunya.
📲Dempús dera benvenguda institucionau, cada airau exposèc es projèctes e pilòts digitaus emprenudi en sòn territòri, compartint experiéncies e rèptes.
🚜🖨️Dera man d’@oppgroupinternational coneisherem era logistica tecnologica e innovadora aplicada ath benèster animau, e en acabat, es empreses @invelontech e @intech3d mostrèren es nauetats en Realitat Virtuau, Aumentada e Mitxa, solucions d’impression e scaneg 3D e fabricacion additiva.
⚙️Tanben, @eurecat_org guidèc as visitaires peth sòn laboratòri industriau entà ensenhar es projèctes pionèrs de maquinària agricòla e industriau.
🍐Fin finau, se visitèc eth Fruitcentre der @irtacat en tot conèisher eth laboratòri de I+D, es cambres de refrigeracion e testeg de productes agricòles, es linhes de processament industriau dera fruta de 3au e 4au gama (seleccion e envasat) e ja en sòn darrèr estadi, damb innovacion en processament d’aliments de 5au gama, presti entath consum. Acabèc era jornada damb una explicacion des sistèmes d’adaiguader entara sua màger eficiència a trauers de sensors e donades satellitaus.
Aué s’an daurit es inscripcions web deth ‘Catalunya Rural Hub’ 2024 que se realizarà ath long de dues setmanes, entre eth 14 e eth 27 d’octobre en Vielha.
Era convocatòria ei dubèrta entà 10 persones que trabalharàn en remòt en coworking de HèPic, eth hub d’innovacion deth Conselh Generau, e interactuaràn damb eth teishut economic e sociau d’Aran.
Aguesta naua edicion deth ‘Catalunya Rural Hub’ supause era continuacion deth projècte iniciat ara hè tres ans peth Govern de Catalunya, a trauès dera Secretaria de Politiques Digitaus, e Mobile World Capital Barcelona, que consistís en atrèir professionaus der encastre digitau tàs zònes ruraus damb er objectiu d’afavorir er arraïtzament deth talent, combàter eth despoblament e dinamizar era economia d’aguesti territòris. Eth Conselh Generau d’Aran, mejançant eth hub d’innovacion HèPIC, pren eth relèu d’aguesta iniciativa entà promòir eth teishut productiu e comerciau dera naua economia digitau enes territòris de montanha.
Segons era sindica d’Aran, Maria Vergés, “era intencion d’aguest projècte ei convertir era tecnologia en un estrument entà melhorar era igualtat d’oportunitats. Ei un cas practic entà demostrar que se pòt víuer en un entorn rurau en tot desvolopar ua activitat professionau tecnologica. Eth trabalh en remòt a hèt possible aguesta naua tipologia de trabalh que, dempús dera COVID, ja s’a implantat en fòrça enterpreses.”
Calendari e dubertura d’inscripcions
En aguesta edicion, un totau de 10 professionaus digitaus auràn era possibilitat de convertir-se en remote workers pendent dues setmanes en Vielha (Vau d’Aran). Es inscripcions entà poder optar a ua d’aguestes places ja son daubèrtes enquiath 31 d’agost. S’i pòden inscríuer professionaus autonòms, trabalhadors/se d’enterpreses digitaus, persones emprenedores e personau de l’Administracion Publica. Entara seleccion se tieràn en compde critèris coma eth genre (se cerque representativitat d’andús); era edat (se promò era multiplicitat de perfils en diferenti moments vitaus); e es sectors desparièrs (entà garantir era varietat de tipologies d’emprenedoria e eth ròtle des participants en aguestes).
Eth projècte se desvoloparà, principaument, en Vielha deth 14 ara 27 d’octobre. Es participants disposaràn pendent 15 dies, gratuïtaments de: lotjament, d’un espaci de coworking, era participacion en un Congrès de Ciberseguretat e un programa d’activitats que les permeterà descorbir era montanha e era nòsta cultura, es enterpreses e eth teishut economic e sociau d’Aran, damb era intencion de que poguen establir relacions personaus e professionaus.
Se meterà ara disposicion des participants totes es installacions disponibles ena zòna entà poder teletreballar en tot compartir espaci de coworking damb persones emprenedores que ja hè dus ans que compartissen aguest lòc. Tanben, s’an organizat amassades damb es principaus enterpreses e iniciatives d’Aran entà hèr a conéisher es oportunitats de negòci deth territòri e es rèptes a superar ara ora d’empréner. Se tracte d’ua iniciativa entà promòir er escambi de coneishença entà préner era decision d’iniciar ua vida en entorn rurau en tot experimentar era melhora dera qualitat de vida compatibla damb eth desvolopament professionau.
Eth programa tanben incorpòre nombroses activitats ludicoesportives e culturaus entà hèr a conéisher tot aquerò qu’eth territòri pòt aufrir ath delà des installacions e era connectivitat. Tastets gastronomics, rotes entà descorbir bòsqui colorits e majestuosi, o projèctes innovadors damb intelligéncia artificiau son sonque quauqu’ues des aventures uniques qu’es coworkers auràn eth privilègi d’experimentar.
Era intencion d’aguest projècte ei incentivar qu’es professionaus s’arraïtzen enes entorns ruraus entà desvolopar-i era sua vida personau e professionau. En aguesta linha, ena avaloracion des participants des anteriores edicions, subergés coma aspècte mès avalorat eth hèt de poder trabalhar entornejadi de natura; eth 80% des participants ditz qu’a melhorat eth sòn rendiment per aguest hèt e sustot era sua qualitat de vida. Eth programa se place, segontes eth 75% des participants, coma motor entà trincar damb es prejudicis sus eth mon rurau, coma qu’era integracion sociau ei complicada, qu’era aufèrta de servicis ei limitada o qu’era connectivitat non ei excellenta. Toti es participantss coïncidissen qu’eth programa ei ua oportunitat unica entà hèr ua prumèra avaloracion sus era possibilitat de convertir-se en emprenedors ruraus.
• Ager, 6 de junh, auec lòc en Sòrt era 1èra Jornada d’Abitatge der Alt Pirineu e Aran organizada per Institut pel Desenvolupament de l’Alt Pirineu i Aran, er Ateneu Cooperatiu Alt Pirineu e Aran e SOMPirineu – IDAPA.
En representacion deth Conselh Generau d’Aran, a participat eth tecnic en matèria d’abitatge, Xavi Castañeda, e tanben a representacion deth nòste territòri a assistit eth baile de Vielha e vice-president dera Diputació de Lleida, Juan Antonio Serrano.
En aguest acte qu’an participat persones de perfils fòrça diuèrsi (tecnicians, politics, academics, eca) s’a analizat era situacion der abitatge des nòsti territòris damb numèros, estadistiques e donades entà obtier ua radiografia iniciau.
Dempús, Sebastià Mata a exposat ua guardada sus era situacion der abitatge ena montanha e enes ruralitats. A seguit David Freixa, qu’a repassat eth listat des ajudes publiques en matèria d’abitatge qu’existissen en Lleida damb es sòns requisits e caracteristiques.
En acabar, s’a daurit eth torn de paraula entàs taules d’experiéncies que s’an exposat es prètzhèts qu’amie a tèrme era taula d’abitatge, atau coma es èishi de trabalh que les articulen. Auem escotat es estrategies d’accès ar abitatge der Ajuntament de Cardona, eth Conselh Comarcau der Urgell e er Ajuntament de Gallifa, qu’an emfatitzat ena importància dera volontat politica entà executar aguestes estrategies. Atau coma, auem aprenut des projèctes cooperatius de Obrint portes Lleida entà facilitar er accès ar abitatge mejançant era masoveria urbana o El Rogle, un projècte de intercooperació entà combàter era solitud non desirada e promòir eth modèl d’abitatge compartit.
Fin finau, s’a desvolopat un collòqui damb toti es assistents entà compartir prepauses, dobtes e idèes, que, era taula d’abitatge a remassat es principaus prepauses d’accion. E s’a barrat er acte damb un pica-pica de productes locaus entà profitar era escadença d’aguesta jornada presenciau entre persones der Alt Pirineu e Aran entà crear naues sinergies.
• Ager, 28 de mai, diferenti representants deth hub d’innovacion HèPIC deth Conselh Generau d’Aran, participèren ena Iª trobada de trabalh deth hilat de Centres d’Innovacion Territoriau organizada peth Ministèri de Transicion Ecologica e Rèpte Demografic.
Aguesta jornada de trabalh qu’auec lòc ena sala d’actes deth Ministèri de Transicion Ecologica e Rèpte Demografic, plaçat en Madrid, auie coma objectiu impulsar eth desvolopament des zònes ruraus mejançant era reactivació economica e era atraccion de talent a trauès des CIT.
Era dubertura der acte siguec a cargue deth Secretari Generau entath Rèpte Demografic, Paco Boya qui enfatizèc ena importància deth desplegament d’aguest hilat de CITs enes zònes ruraus de tot eth territòri entà èster en comunicacion dirècta e atau establir aliances entà apostar amassa peth futur des nòsti pòbles.
Dempús, eth gerent de territòri der Institut Cerdà, Lluís Inglada realizèc un brèu explicacion des objectius d’aguesta jornada, dempús presentèc a Ciuden coma entitat coordinadora des CIT e anèc dant pas a cadun des nau CIT, entre es que se trobaue HèPIC e cadun exposèrem eth nòste encastre d’accion, es rèptes de cada territòri, es linhes de trabalh qu’amiam a tèrme e es besonhs actuaus des nòsti CIT.
En acabar, se procedic a introdusir a ueit enterpreses d’encastres fòrça diferenti (energies, finances, academiques e sociaus), que hèn part der Institut Cerdà e son interessades en conéisher e collaborar damb es projèctes en desvolopament des CIT. Representants de totes eres, heren a conéisher es principaus linhes de trabalh des enterpreses restacades damb era innovacion e eth desvolopament des zònes ruraus, en tot méter er accent en aqueri aspèctes damb es que milhor pòden cooperar damb es CIT.
Dempús d’ua brèu pausa ena que se profitèc entà hèr networking damb aguestes enterpreses, se procedic a realizar era exposicion der Ecosistèma de Emprenedoria e Innovacion en Miei rurau d’Aragon (EREA+) qu’a desvolopat un modèl de cooperacion entre totes es entitats restacades damb era emprenedoria e era innovacion d’Aragon entà júnher esfòrci e evitar duplicitats, en tot crear un hilat fòrça accessible e practica entàs persones empresàries deth territòri.
Dempús se presentèc a Enisa, era societat de capitau public deth Ministèri d’Indústria qu’aufrís credits empresariaus entà finançar a persones emprenedores e se relatèren totes es caracteristiques des prèsti qu’aufrissen, atau coma es condicions, quantitats e interèssi d’aguesti. Fin finau, eth Secretari Generau barrèc er acte en tot presentar ara naua coordinadora de Ciuden e en tot aufrir supòrt as CIT entà promòir eth sòn desvolopament e méter en valor eth trabalh en hilat.
• Eth Conselh Generau d’Aran a daurit era convocatòria entà sollicitar subvencions entar exercici 2024
• Eth tèrme de presentacion de sollicituds de subvencion finalize eth pròplèu dia 30 de junh de 2024
Es diuèrsi encastres objècte d’aguestes convocatòries son es següents:
A) Subvencions en encastre de Cultura e Lengua.
Eth Conselh de Govèrn deth Conselh Generau d’Aran de data 15 d’abriu de 2024 a aprovat era convocatòria entara concession de subvencions en airau de cultura e lengua entar an 2024.
Er àmbit temporau d’execucion des activitats a realizar ei comprenut entre er 1 de gèr de 2024 e eth 31 de deseme de 2024.
B) Subvencions en encastre d’Espòrts.
Eth Conselh de Govèrn deth Conselh Generau d’Aran de data 15 d’abriu de 2024 a aprovat era convocatòria entara concession de subvencions en airau d’espòrts entar an 2024.
Er àmbit temporau d’execucion des activitats a realizar ei comprenut entre er 1 de gèr de 2024 e eth 31 de deseme de 2024.
C) Subvencions en diuèrsi airaus.
Eth Conselh de Govèrn deth Conselh Generau d’Aran de data 15 d’abriu de 2024 a aprovat era convocatòria entara concession de subvencions en diuèrsi airaus entar an 2024.
Er àmbit temporau d’execucion des activitats a realizar ei comprenut entre er 1 de gèr de 2024 e eth 31 de deseme de 2024.
