Repensar es servicis publics enes nòsti camps. Aguest ère eth títol dera session informativa en Senat francés: Repenser les services publics dans nos campagnes. Eth dia 16 de març, era nòsta companha de HèPic, Marguerite Chaignot, intervenguec deuant es senadors francesi en ua jornada sus es politiques ruraus ena Union Europèa que se hec en ua sala de comissions deth madeish Senat francés.
Aguest eveniment, organizat pera Association Nationale Nouvelles Ruralités, ère era tresau trobada deth Parlament rurau francés. Pretenie méter sus era taula era manèra de “ruralizar” es politiques dera UE. Tau e coma presentèren, era manèra d’artenhé’c ei mejançant ua agenda rurau que sigue realista damb es ambicions dera societat europèa e afavorisque eth desvolopament des territòris ruraus. Per açò s’exposèren mesures eficientes des administracions publiques entà atier es besonhs deth mèdi rurau.
Ena session, ena que i auie senadors, eurodeputats, comissaris europèus e investigadors, era nòsta companha expliquèc eth caractèr de HèPic. Es sòns inicis e eth contèxte dera sua creacion, enquia exemples de projèctes que se desvolopen.
Eth matís siguec autrejat per M. Patrice JOLY, senador dera Nièvre e president d’ANNR, que hec ua remèrca e demanèc pes procèssi ciutadans Aran Accion 2020-2030. Se demanaue s’aguest element tecnic e de democràcia auie estat util entà conéisher es desfisi actuaus dera Val d’Aran, de crear un ecosistèma d’actors.
Entà veir tota era session, clicatz en aguest ligam: https://www.youtube.com/watch?v=siIwgFD19Qo
Aguesta conferéncia permetec hèr a conéisher HèPic coma exemple de projècte entà desvolopar es territòris ruraus e dar solucion as problematiques actuaus mejançant era innovacion. Per açò, non dobtetz en contactar-mos entà descorbir eth nòste foncionament o s’ès un innovador o ua innovadora que vò auançar damb era sua idea. Enviatz-mos un corrèu tara adreça infohepic@aran.org.
