• Dempús dera signatura deth convèni deth Conselh Generau d’Aran damb eth Ministèri tara Transicion Ecologica e eth Rèpte Demografic tara cession d’aguest edifici, aguesta a estat dejà oficializada.
• Eth govèrn aranés començàrà era prumèra fasa de reabilitacion, der edifici que servirà entà acuélher eth nau espaci comun, HÈPIC, de coworking e de dinamizacion dera activitat economica e empresariau vinculat ath HUB d’innovacion.
• Er actuau espaci coworking, plaçat ena carretèra de Gausac a acuelhut enquiath moment a ua ueitantia d’usatgèrs pendent es dus ans qu’ei actiu, des quaus sèt i an demorat de forma permanenta e ei de besonh un nau espaci pr’amor deth naut nombre de sollicituds e es dimensions deth madeish.
Eth Govèrn d’Aran artenh per part deth Estat era oficializacion dera cession dera antiga bastissa d’òbres publiques plaçada en centre de Vielha dempús dera signatura deth convèni entre andues administracion. Ara ei previst que s´inicie era prumèra fasa des òbres d’adeqüacion der espaci per part deth Conselh Generau d’Aran, damb hons pròpris e damb recorsi provients d’un ajut dera secretaria generau tath Rèpte Demografic, corresponenta ara reabilitacion integrau d’aguest equipament d’usatge public, qu’a de servir entà consolidar un espaci comun, Hèpic, e qu’acuelhe eth nau espaci de coworking e de dinamizacion dera activitat economica e empresariau, vinculat ath HUB d’innovacion.
En aguesta bastissa se preten tanben crear un punt de connexion entre empreses de disparièri nivèus, actuant de dinamizador entre petites iniciatives d’emprenediment e d’autes de major grad de consolidacion. Actuaument, aguesta foncion s’amie a tèrme en espaci de coworking vinculat a HèPic.
Atau madeish, damb era abilitacion de tot aguest espaci, que s’amiarà a tèrme per fases en tot iniciar-se es prumèrs trabalhs ena antica casa, eth govèrn d’Aran cedirà ua part dera finca ar Ajuntament de Vielha e Mijaran entà que pogue bastir un carrèr que connècte era avenguda Castièro damb era zòna des jutjats de Vielha, en tot daurir atau aguesta zòna deth cap lòc aranés.
Entara sindica d’Aran, Maria Vergés, aguesta cession « permeterà contunhar damb es politiques d’innovacion territoriau e de retencion deth talent que deth govèrn d’Aran ençà venguem trabalhant » e higie que « aguest edifici pòrte ans en desús e damb aguest nau emplec ajudarà a, per un lòc dignificar aqueth espaci de Vielha e, per aute, a dar un nau impuls ath trabalh qu’era maxima insitucion amie a tèrme entà diversificar eth nòste modèl economic ». ´
