HèPic participèc a principis de hereuèr enes prumères jornades Hilat de Centres d’Innovacion Territoriau en municipi asturian de Pola de Somiedo. Aguest eveniment, organizat peth Ministèri entara Transicion Ecologica e eth Rèpte Demografic, amassèc a entitats publiques e privades de diferentes províncies entà méter en comun es estratègies, objectius e solucions innovadores qu’a cada territòri.
Ena exposicion amiada a tèrme peth responsable de HèPic, qu’ei important per èster eth prumèr Centre d’Innovacion Territoriau, se remerquèc eth metòde innovador e participatiu que produsic eth madeish centre. Aguest eveniment permetec intercambiar experiéncies ruraus e assolidèc es relacions inter e intra territoriaus d’aguesti centres.
Es Centres d’Innovacion Territoriau son eth nau modèl entà promòir un desvolopament sostenible e sociauments responsable des territòris e, ath madeish temps, servís tà trincar damb era inèrcia de desbrembe qu’an patit aguesti lòcs.
Ath long d’aguest eveniment gessec un concèpte comun en totes es convèrses: eth dera innovacion. Poder diversificar eth modèl economic e revalorar eth pròpi contèxte de cada territòri s’artenh gràcies ara innovacion, a naues solucions que nèishen enes pòbles. Tà atrèir aguesta metodologia, es CIT son ua palanca entàs administracions, es empreses, es organizacions e es persones. Aquiu, toti es agents son benvengudi.
Ath delà, se remerquèc qu’era innovacion non ei tecnologia e pro, tanben ei potenciar eth capitau uman pròpri de toti e cada un des pòbles. Per açò madeish, innovar permet potenciar, restacar e atrèir eth talent de persones damb idees naues e un compromís fòrt damb eth mèdi ambient e era societat.
En darrèr lòc, en aguestes jornades HèPic collaborèc reïterant eth sòn compromís damb toti e totes es persones e Centres d’Innovacion Territoriau mejançant era Declaracion de Somiedo entara Innovacion Territoriau en Mèdi Rurau, qu’ei un decalòg de proposicions qu’aspiren a convertir-se en principi d’accion d’aguestes palanques innovadores der entorn rurau.
