Eth dimars 19 d’abriu er alumnat deth Cicle Formatiu d’Ensenhament e Animacion Socioesportiva der Institut d’Aran visitèc eth Centre d’Empreses Innovadores Val d’Aran (CEI) en Casau. Es estudiants podèren conéisher eth foncionament deth CEI, de HèPIC e deth Servici d’Emergéncies de Pompièrs-Emergéncies, deth Conselh Generau d’Aran.
Pendent era jornada, se transmetec era idèa de qu’era innovacion ei de besonh enes territòris ruraus. Comprenèren qu’existissen diuèrses problematiques qu’afecten as territòris de montanha, tàs que cau solucions d’acòrd damb eth contèxte e auent en compde es particularitats der entorn. Ei per açò, qu’atrèir era innovacion a Aran s’a convertit en un prètzhèt fonamentau, e transversau.
Ena visita as empreses deth CEI comprovèren de prumèra man es auantatges des espais de trabalh compartits enes que se produissen sinèrgies entre es empreses. Ath delà, auèren era possibilitat de veir era naua sala d’Emergéncies deth Conselh Generau d’Aran, a on les expliquèren era importànica e eth foncionament d’aguest nau servici que gestionarà de forma dirècta es comunicacions ath 112, çò que supausarà er escuerçament des tempsi que pòt resultar vitau.
Aguesta visita permetec hèr a conéisher HèPic, eth CEI e hèr-les particips dera innovacion coma futurs professionaus der Espòrt. De HèPIC ençà, se trabalhe tà promòir era metodologia d’intelligéncia collectiva e trabalh en equipa a trauès dera innovacion a tota era societat entà qu’es territòris de montanha coma Aran de desvolopen de forma sostenibla. Per açò, non dobtetz en contactar-mos entà descorbir eth nòste foncionament o s’ès ua persona innovadora que vò auançar damb era sua idea. Enviatz-mos un corrèu tara adreça infohepic@aran.org.
