Era sindica d’Aran e es tecnics e tecniques a cargue deth HUB presentèren ager es servicis qu’aufrís HèPic as emprenedors/es e empreses de zònes de montanha coma era Val d’Aran, que vòlen desvolopar projèctes innovadors damb un impacte socioeconomic positiu entath territòri
Ager auec lòc era presentacion telematica des servicis actuaus de HèPic, eth HUB d’innovacion rurau en zònes de montanha plaçat ena Val d’Aran. Aguesta presentacion siguec presidida pera sindica d’Aran, Maria Vergés, e compdèc damb era preséncia des tecnics e tecniques ath capdeuant deth projècte, qu’expliquèren as assistents en qué consistís HèPic, es servicis qu’aufrís e en quini projèctes trabalhen.
“HèPic a coma principau objectiu ajudar ena creacion, implantacion e expansion de projèctes innovadors e sostenibles damb impacte positiu enes zònes de montanha coma era Val d’Aran, en tot generar ua activitat socioeconomica diuèrsa, innovadora e sostenible, que permet retier e captar talent joen”, explicaue era sindica d’Aran, Maria Vergés.
En aguesti moments, HèPic da supòrt a un totau de 9 projèctes, 4 d’eri d’ambit public e 5 d’ambit privat. En airau public se trabalhe en projèctes relacionadi damb era transicion energetica, sostenibilitat toristica, valorizacion de productes locaus e formacion.
Entre es servicis qu’aufrís aguest HUB, i a servicis d’assessorament, plan de negòci, mentoring, definicion deth projècte professionau e canals de convèrsa, e, pròplèument, s’abilitarà un co-working e s’aufriràn charrades e networking.
Es persones qu’agen ua idèa o projècte e siguen interessadi en formar part de HèPic, pòden contactar damb es tecnics ath cargue a trauès der email info@hepic-hub.org.
